America: Don't Be Ashamed

Back To Origin

امریکہ۔ شرم کس بات کی؟
| ـ 5 اکتوبر ، 2011

عطاءالرحمن......
امریکا کا افغان مسئلہ فی الواقعہ ہے کیا؟ کیا واحد سپر طاقت واقعی ملک افغاناں پر اپنے 10 سالہ فوجی قبضے کو ختم کر کے وہاں سے تمام افواج کو پرامن طریقے سے واپس بلا لینا چاہتی ہے جبکہ اس کے مطابق حقانی نیٹ ورک پاکستان کی آئی ایس آئی کی مدد کے ساتھ اس کی ٹانگ کاٹ رہا ہے، یوں اس کا عظیم مقصد پورا نہیں ہونے پا رہا۔ اگر ایسا ہوتا تو واشنگٹن کے حکمرانوں کیلئے سوویت یونین کے خلاف معرکہ آرائی کرنے والے اپنے قدم اتحادی جلال الدین حقانی جنہیں کبھی دوسرے افغان مجاہدین کے ساتھ صدر ریگن نے وہائٹ ہاﺅس میں چائے کی دعوت بلا کر عزت بخشی تھی، جنگ آزادی کا ہیرو قرار دیا تھا آج موصوف اور ان کے بیٹوں کے ساتھ اوباما انتظامیہ کیلئے کسی قابل عمل فارمولے پر سمجھوتہ کر لینا چنداں مشکل نہ ہوتا۔ وہ سی آئی اے سے ڈھکے چھپے لوگ نہیں نہ ایسی غاروں میں چھپے بیٹھے ہیں کہ پہنچنا مشکل ہو۔ پاکستان کی حکومت اور فوجی اسٹیبلشمنٹ کے بارے میں کہنے کی ضرورت نہیں کہ وہ ہمیشہ سے امریکہ کی دوست چلی آرہی ہے لیکن مسئلہ ہرگز ہرگز اتنا سادہ نہیں۔ یا تو صدر اوباما اور امریکہ کی فوج صرف حقانی نیٹ ورک اور اس کے پس پشت آئی ایس آئی کا الزام عائد کر کے اپنے آپ کو دھوکہ دے رہے یا ابھی وہ افغانستان سے نکلنا نہیں چاہتے اور اس مقصد کیلئے انہیں بہانے درکار ہیں۔
ملک افغاناں کا اصل اور بنیادی مسئلہ وہاں کے عوام ہیں جن کا حریت پسند مزاج اور تاریخی کردار کسی حوالے سے بھی غیر ملکی قبضے کو برداشت نہیں کرتا۔ یہ صرف آج کا قضیہ نہیں تاریخ کے ہر اہم دور نے اس پر اپنی شہادت ثبت کی ہے۔ سکندر اعظم سے لے کر سلطنت برطانیہ کے نہ رکنے والے توسیع پسندانہ عزائم اور سوویت ہاتھی کے زخموں سے چور چور ہونے سے لے کر آج کی واحد سپر طاقت کی حالت زار تک.... مسلسل ایک کہانی ہے جو جفاکش افغانی اپنے خون اور جانوں کا نذرانہ دے کر رقم کر رہے ہیں۔ انہوں نے کسی ایک بھی قابض طاقت کے پاﺅں جمنے نہیں دیئے، عہد قدیم میں جب ابھی توڑے دار بندوقوں نے بھی رواج نہیں پایا تھا اور آج کے عہد میں بھی نہیں جبکہ جدید سائنس کی محیر العقول ترقی کی بدولت جنگی ٹیکنالوجی نے اس حد تک عروج حاصل کر لیا ہے کہ صرف امریکہ کی برتر فضائی قوت ہی پوری دنیا پر اپنا دبدبہ قائم کر سکتی ہے، افغان اس کے قابو میں نہیں آرہے۔ آج امریکہ کا ہر پالیسی ساز اور قابل ذکر دانشور علی الاعلان تسلیم کرنے پر مجبور ہے کہ افغانستان کا فوجی حل ممکن نہیں۔ دوسری زبان میں اس کا مطلب یہ ہے کہ امریکی ہوائی قوت کے ساتھ مل کر 1 لاکھ 40 ہزار زمینی فوج بھی افغان عوام کے بے پناہ جذبہ آزادی کو شکست دینے میں ناکام رہی ہے۔ اگر امریکہ میں اعلیٰ ترین پالیسی سازی کی سطح پر اس حقیقت کا ادراک ہو چکا ہے جیسا کہ وہاں سے ملنے والی معلومات سے ظاہر ہوتا ہے تو پھر آپ حقانی نیٹ ورک کے مٹھی بھر جنگجوﺅں کو مطعون کر کے اور اپنی تمام ناکامیوں کا ذمہ دار 80، 90 اور پھر مشرف عہد کی اتحادی آئی ایس آئی (جس کے راز ہائے درون خانہ آپ سے چھپے ہوئے نہیں) کو ٹھہرا کر کسے بیوقوف بنانے کی کوشش کر رہے ہیں؟ افغان امور کا ہر ماہر جانتا ہے کہ حقانی نیٹ ورک زیادہ سے زیادہ 7 صوبوں میں موثر ہے۔ تو کیا بقیہ افغانستان میں آپ نے مکمل امن قائم کر لیا ہے؟ جہاں تک آئی ایس آئی کے رسوخ کا عالم ہے تو اگر ایک چھوٹے سے ہمسایہ ملک کی خفیہ ایجنسی اگر 1 لاکھ 40 ہزار امریکہ اور ناٹو افواج کو ناکوں چنے چبوا سکتی ہے تو بہتر ہے وہ اپنی دکان بڑھا لیں۔
امریکہ کے لئے واحد طرز عمل یہ ہے کہ وہ افغان عوام کے نمائندوں کے ساتھ براہ راست اور کھلے عام میز پر بیٹھ کر مذاکرات کرے جیسا کہ اس نے ویت کانگ کے ساتھ کیا تھا۔ تب بھی امریکہ نے اندرون ویت نام اپنی شکست کی ذمہ داری ہمسایہ لاﺅس اور کمبوڈیا پر ڈالنے کی کوشش کی، وہاں بمباری بھی کی۔ یہی طرز عمل واشنگٹن والے افغانستان کے باب میں پاکستان کے بارے میں اختیار کئے ہوئے ہیں۔ اب بھی اسی حشر سے دوچار ہونے والی ہے۔ امریکہ نے طالبان کے کچھ نمائندوں کے ساتھ خفیہ مذاکرات کا ڈول ڈالا ہوا ہے۔ کامیاب اس لئے نہیں ہو پا رہا کہ ضرورت ان کی قیادت سے براہ راست بات چیت کی ہے اور پاکستان سمیت تمام Stake Holders کو اعتماد میں لے کر کرنے کی ہے۔ ویت نام میں آپ نے آخر کار یہی اپروچ اختیار کی تھی اب شرم کیوں محسوس کر رہے ہیں!!!